Mo Nighean Chruinn Donn

Dh'fhalbh mo nighean chruinn donn
Uam don Iùraidh
Dh'fhalbh mo nighean chruinn donn
Cneas mar eal' air bhàrr thonn;
Och is och!  mo nighean donn,
Dh'fhàg mì-shunnd orm.

'S truagh nach robh mi 's mo ghaol
Ann an gleann cùbhraidh;
'S truagh nach robh mi 's mo ghaol
Ri uisg' ann 's ri gaoith,
'S fo shileadh nan craobh
Bhitheamaid sùnndach.

Ged tha thusa an dràsd
Ann an gleann Iùraidh;
Ged tha thus' ann an tàmh,
Tha t'aigne fo phràmh,
Agus mise gun stàth,
Le do ghràdh ciùrrta.

Beir mo shoraidh le gràdh
Uam do'n Iùraidh;
Beir mo shoraidh le gràdh
Dh'fhios na h-òigh rinn mo chràdh;
'S o nach maith leath' mar tha,
Tha i féin tùrsach.